تروي صديقة المريضة ما حصل للمسحورة بالتفصيل بعد اخذها العلاج من شبكة الشفاء , نترككم مع القصة :

يسعد صباح ومساء جميع الاخوات والاخوان
صار لي فتره طويله مانزلت موضوع واكتفيت بالمتابعه من وقت لوقت
وحبيت اليوم ادخل معاكم بموضوع واقعي صار لي ماتخيلته بيوم من الايام


طبعا لايكاد يخلا تلفون من برنامج الواتسب لكل انواع الجوالات ووسائل الاتصال
ورسائل يوميه تصلني من جميع او اغلبية الاهل والاقارب والمعارف والاخوات

في يوم من الايام دخلت علي اخت من الاهل تراسلني .. ماعرفت الرقم ولامن اللي يكلمني وكالعاده اتحرى من المرسل قبل الخوض باي مراسلات الين قالت لي يافلانه انا فلانه بنت فلان

طلعت وحده من الاهل رحبت فيها وهللت وخزنت رقمها ، وللامانه كنت كثيرة الاهتمام بها لان ابوها كان غالي وعزيز لابوي الله يرحمه ويغفر له فكانت يوميا ترسل لي وارسل لها وحتى خواتها واسال عنها وعن امها وابوها وابلغهم السلام بر بوالدي رحمة الله عليه

قدر الله ان امها وابوها يحجون مع من حج السنه هذي وخلال سفرهم البيت يفضى الصباح اخوانها اما فالمدرسه او بالشغل وتظل بروحها فالبيت فكانت تستوحش وتخاف وكنت كل ماجاتني فرصه الصبح اسولف وياها الاخت هذي مطلقه وعندها ابناء لكن شاء الله ان تفترق عنهم وياخذهم ابوهم عنها بالحيله ولاحول ولاقوة الابالله

اما سبب طلاقها فكان سحر تفريق لابارك الله في كل انسان يسعى للطريق هذا وربي ينتقم منهم اجمعين

الين اخر وقت واستعدادي للخروج جلست جنبي فدخلنا بسوالف زواجها وطلاقها وتسالني اذااعرف سبب طلاقها ققلت اي سمعت مشاكل !
شافتني مستغربه اي مشاكل بس عارفه من ايش قلت لها لا والله ولااحب اسال
قالت علطول قالت لي مسوين لي سحر علشان اتطلق من ريلي وصار وتطلقت منه مرتين !!!

قمة الصدمه وجهي تغير وتلون ابدا ماتوقعت ولاعرفت السبب الا منها
شافت تعابير وجهي قالت والله ماتعرفين قلت والله اللي خلقني ماعرف ولااي حد من هلي قالت الناس كلهاتعرف الاانتو

قلت احنا بطبعنا مانخالط الناس كثير وخاصه امي لانها كبيرة سن وماتطلع فالناس يزوروها للبيت اما امي ماتروح ولاتطلع الا للناس القراب

توها كانت بتبتدي كلام عن السحر وشلون تعذبت ٩ سنين ممنه الااختها جات وقعدت جنبنا وعلطول سكتت وتجهمت وترد على اختها بالغصب فتعجبت منها ليش تعامل اختها بالطريقه هذي

طبعا خواتها فالبيت ينادونها بالمعقده وانها مب مالة صحبه او رفجه وانها ماتتكلم نادر مايسمعون صوتها لدرجة انها ترد عليهم بهز الراس فقط بدون نطق كلمه وان احد كرر عليها السؤال تصرخ بوجه وتقولةلهم ماابي اتكلم روحو عني !!!!

هني تعجبت اكثر واكثر ايش هالحياه اللي تخليني ساكته مااتكلم مع هلي ،، يوم سالت خواتها بالخش قالة علشان عيالها خذوهم منها

الكلام ابدا مادش مخي ولااقتنعت فيه فشكيت فيها هل لازالت مسحوره وخاصه ان تصرفاتها ابدا مب طبيعيه
انسان شهر كامل ساكت مايتكلم داخل البيت وان انجبر تصرخ بوجه اللي يكلمها !!

قمت اسلم عليهم ابي اطلع ارجع بيتي والوقت خذاني مع السوالف فقلت لها على جنب نكمل سوالفنا فالبيت هزت راسها ميتسمه كان هالشي كانت تبيه فعلا

سلمت عليهم كلهم وطلعت من بيتهم وطول الطريق افكر بكلام خواتها وكلام الاخت نفسها لي واقارن تصرفاتها باللي ينقال عنها ...

يتبع ان شاءالله

رجعت البيت خلصت امور عيالي وجاوقت السوالف مع الاخت ،،، وكانت منتظرتني على احر من الجمر
حسيتها تبي تفضفض لاي انسان داخلها كومة هموم وضيق وماعندها بنظرها من اهلها من يوقف معاها ويساعدها

طبعا كان بدايته كلام عن لمتنا وجيتنا وضحكنا وعقب دخلنا بموضوعها
هي : كنتي وايد مصدومه من كلامي ليكون مب مصدقتني
انا : لاابدا ليش ماصدق وشاللي بتستفيدين من كذب بموضوع مثل ذي
هي : الحمدلله طمنتيني كنت خايفه ماتصدقيني !!!
انا : الجن خلق من خلق الله مثل البشر والسحر مذكور فالقران شلون ماتبيني اصدق كلامك
هي : صح بس اهلي للحين مش مصدقين اني مسحورة !!

كانت صدمة ثانيه لي شلون مش مصدقين وطلاقك ايش فسروها اهلك قالت فسروها انه دلع وحاله نفسيه !!!! يالله ماتخيلت ان في ناس تفكيرهم بالطريقه هذي

البنت تاكدت بعد يومين من كلامي وياها انها للحين مسحورة وانها تشوف الجن فالبيت باشكال مرعبه مخيفه وهي بنفسها قالت لي انا اعرف شفيني انا للحين مسحورة واللي فيني سبب تعاستي وللحين اشوفهم قدامي فالبيت ٣ من الجن باشكال حيوانات كل مااكون مضايقه ومهمومه يطلعون لي يتمشون فالبيت !!!!!!

كانت تقيس نبضي هل بصدقها او لا نفس اهلها... بس انا فعلا صدقتها وماكذبتها
قلت لها انتي عارفه شفيك وساكته عن نفسك ليش قالت علطول مطوع مب رايحه له لو اموت !!

قلت لها ماتبين تشفين واطيبين من اللي فيك ؟ ردت علي اصلا اللي فيني ماراح يتركوني هم قالوها قلت هم اضعف خلق الله لاتقويهم تراهم جبناء خوافين بس انتي عزمي النيه وتعالجي

قالت لا يكفي اللي ذقته واصلا المشايخ هم سبب طلاقي !!!!

قلت لها انتي جربتي تروحين لهم قالت اي عيل شلون تطلقت قلت اشرحي لي مافهمت

قالت عمي وداني لشيخ يقرا علي وتميت ارجع لين تقطعت معدتي وعقبها اغماء نص الى يوم كامل

اقوم عقبها متألمه متعذبه هم يحسبوني مغمى علي وفالاصل اكون انجلد وانضرب من الجن لاني رضيت اروح للشيخ ،،، وجسمي كله بقع زرقا من اذيتهم لي وهلي يشوفوني اتالم ولايدرون ان هالشي من سبة اذيتهم لي

قلت لها وبعدين قالت عقب ارفض اروح مرة ثانيه لشيخ وارفض اخذ العلاج علشان مايصير فيني اللي صارمره ثانيه
صدمت من كلامها وقعه النفسي علي كان كبير وحده مسحورة محد وقف معاها من اهلها ولاهم معترفين به وفالاخير كرهت روحة المشايخ والسبه الاذى اللي شافته وساكته ماتقدر اتكلم به لان محد مصدقها

والله العظيم انها مصيبه ومصيبه كبيره جرها الله فيها ورفع قدرها بكل ماعانته من الم وعذاب

تميت اسبوع لعشرة ايام اقنعها بالعلاج واوضح لها فكرتها ان المشايخ عمرهم ماكانو سبب للطلاق الا هم سبب لعلاجك وشفاك باراده الله وان انتي قوي ايمانك بالله واستعيني فيه وحده وان كانت نيتك فعلا الشفاء الله بيسهلها لك

وانا معاك من البدايه للنهايه بس وافقي انتي
قالت لي اذا انتي معاي بوافق ... تحسب اني انااوديها لشيخ يقراعليها قلت لها مايصير يختي لازم محرم وانا وانتي حريم ماينفع قالت من المحرم قلت ابوك

صرخت مستحيييييل ولاتجيبين طاري ابوي ... قلت لها تعوذي من ابليس ترى ابوج مهما سوى قالت ابوي كان يشوفني مغمى علي وكان يسمع الجني ينطق بلساني ولاصدق سحبني من يدي وقال حاله نفسيه

هلكت وانااحاول اقنعها قلت زين اخوج قالت اهلي بعدي عنهم قلت من وين اجيب محرم لج قالت انا وانتي نروح لام محمد الهاجريه .....

سكت وفكرت وسالت عن ام محمد لكن عرفت انها تقرى رقيه جماعيه للكل فقلت ماينفع بحالتها لازم حد يمسكها ومب اي حد خاصه ان السحر له ٩ الى ١٠ سنين

رجعت كلمتها واحاول قالت ليش مصره ترى اللي فينيٍ مسلمين !!! قلت لها نعم !!! قالت اي هم قالو لي

قلت وانتي صدقتي لو هم مسلمين مااذوج ماتعبوج ماسووفيج كل هالامور قالت هم ياذوني بس اذا سمعت الرقيه او تعالجت قلت لها وتسميهم مسلمين هذوله كفار وهم من خوفهم من الرقيه والشيخ خوفوج بالتهديد ان لو رحتى ياويلج منا وله ليش كل مارحتي لشيخ جابو لج راس المطوع بيدهم انهم ذبحوه ... هالكلام منها طبعا كانو الجن يسوون فيها كذا علشان ماتروح انهم ذبحوه وواذا راحت استلموها تعذيب من ضرب والام نفسيه وجسديه

هني يوم وضحت لهاالفكره بدت تقتنع وقالت خليني افكر ... طبعا يعلم الله شكثر عانيت علشان اقنعها لدرجه قلت لها دامك ماتبين العلاج ليش كلمتيني وليش دخاتيني بامور حياتك خلاص روحي فحالج وتركيني تراني بشر تعبت وانا احاول اقنعك

خافت اني اتركها وقالت خلاص اوعدك افكر وكاانت بداية الغيث .... قطره

يتبع ،،،،

ثاني يوم كلمتني شلون العلاج قلت لها كبدايه ابتدي علاج نفسك بنفسك يعني ناخذ كل الخطوات من النت من مواقع علاج السحر واطبقينه حرفيا وانا بكون معاك واي شي يصير كلميني اول باول

قالت ماعندي نت قلت مب مشكله انا بكتبه لك كامل وانتي خزنيه وكل يوم لمدة شهر قدام تسوينه
قالت لي طيب
قلت لها مستعده قالت اي ... سالت خايفه قالت اي قلت لاتخافي الله معاك ومطلع عليك وتحت اي موقف او تصرف يصير كلميني علطول سواء تعبتي او اغمى عليج او اآذوك بحيث اشتد الامر عليك اكلم اهلك

قالت ان شاءالله مانوصل للمرحله هذي قلت اللعم اميين

كان اتفاقي معاها تبتدي العلاج بحيث ترقي نفسها بنفسها واكون معاها متابعه وان تعبت او صار شي قوي لاقدرالله اضطر اكلم اي حد من اهلها علشان يشوفونها
بديت ابحث فالنت ودخلت مواقع كثيره

كانت خططة العلاج كما يليً:
الالتزام بجميع الصلوات باوقاتها والحمدلله كانت ملتزمه
الاذكار الصباحيه والمسائيه وقول لااله الالله وحد لاشريك له له الملك وله الحمد وهو على كل شي قدير ١٠٠ مره
اكل عالريق ٧ تمرات عجوه
قراءة سورة البقره يوميا
وقراءة ايات السحر ( الرقيه الشرعيه ) على ماء زمزم مع اذكار الرسول في السحر من الاحاديث وتشرب منه صبح ومساء وتغتسل منه مع ٧ ورقات سدر

وهذا كله كان اجتهاد شخصي من المواقع اللي كنت ادخله وانسخه لها....

بدينا العلاج وكانت مرحله صعبه وكنت متوتره لايصير فيها شي وكنت والله الجوال معاي وين مااروح مااتركه ابدااا خوف تكلمني وماانتبه لها

بدت من بعد صلاة الفجر الاذكار وكل اللي قلته لها ... فالبدايه ماقدرت تاكل التمر تقول اكرهه قلت معليه تحملي فكانت تاكل حبه بالموت وعقبهاالم فبطنها يقطعها ولما كانت تقول لااله الالله ١٠٠ مره يجيها ضيق الدنيا وتسرح عقبها وتنسي كم مره قالت فاخليها تعيد من جديد وتركز وتحسب سورة البقره كانت تقراها في ساعه وبعدين بنص ساعه اقول لها تدبري السورة مب عالسريع تقريها

قالت اسرح واجد قلت جاهدي وحاولي تركيزك فيها .... شفاك فالبقره ان شاءالله هي المانعه لاتستطيعها البطله واعطيها احاديث عن فضلها وكانت تجتهد معاي

كانت تجيهاالالام بكل جسمها وصابره وكانت اذا شربت من الماي المقري بطنها يتقطع الم واذا اغتسلت بالماي المقري جسمها يحرقها تقول لي ولعت جسمي يحترق شاسوي

كنت اصبرها واواسيها وان دام تحسين بالالام هذي معناته اللي نسويه صح تحملي ترى الالم هذا المهم هم وانتي تحسين فيه لانهم فيك فكانت تصبر وتتحمل
طبعا من بدت العلاج جاتها ضيقه تحس انها بتنفجر انا ياما قلبت علي وياما زفتني وكنت صابره ومتحمله علشانها

ادري اللي تقوله مب منها وانه من اللي فيها مرات كانت تقول لي اففف روحي فكي عني انتي ماتحسين اقول لها قريتي البقره واسالها عن العلاج والمشكله كانت ترد علي وتقلب مره ثانيه وتشين نفسيتها معاي

كنت اقول لعا ادري انك ماتبي تكلميني ومع هذا مب زعلانه تقول لي اتركيني الحين مابي اقول كلمة تضايقك فافهم انها بتنفجر وتبي تتهاوش معاي فقلت لها طمنيني اول باول

يوم شفت تقلبها هذا جلست اقرا فالنت وش الحل للي بحالتها .... قريت ان الجن يكرهون الخل وماي الورد والمسك
واكلمها عندك خل فالبيت ... ترد اي ليشٍ قلت الحين تروحين تاخذين خل وتمسحين جسمك كامل به

وسبحان الله تفك عنها الاعراضٍ كلها وترد طبيعيه
او ان كرمكم الله واجلكم يجيهااسهال اسوود وعقبها تفك الاعراضٍ عنها كامل وترتاح
اول اسبوع كانت خايفه وتحلم فيهم انهم معاها بالغرفه وان ٢ من الجن يضربون الثالثٍ
او انها تشوفهم بنظرات مخيفه لها بس ماياذونها لانها الحمدلله محصنه او يكونون جالسين واحد على كتفها ويضغط عليها والثاني على رجلها يشل حركتها والثالث يخنقها جالس عالصدر

والله الذي لااله الاهو كل ماذكرته واقع ومش تاليف المسكينه عانت كثير لانهم ثلاثه فكانت الامها مبرحه

اذكر مره من المرات كانت تعبانه واهلهالزمو عليها تروح معاهم بحر الخور فراحت مجبوره وزعلت عليها
بس قلت لها تقدرين تروحين تمشين في ماي البحر وتغسلين يدك فيه قالت اي بحاول

وتروح وكل ماتقرب منه كل مرجولها توقف كان حد يشل حركتها الين وصلت بالموت وجلست ورجلها ويدها بالبحر تقول تالمت الم ماتحملت طلعت منه ترتاح وعقب رجعت حول ربع ساعه تحلف لي ان والله رجلهااليسار انتفضت نفض وخستها خفيفه كان شي طلع منها وتزول عنها الالام والضيق والحريق اللي بجسمها وترد انسانه طبيعيه تضحك وتسولف مع اهلها واهلها مصدومين شفيها تسولف وتتكلم ....

مرت الايام وكل يوم تقوى عزيمتها وتتحسن عن قبل .... ايام وعقب تنتكس وتقلب علي وهذا حالنا مده شهر تقريبا
بس اللي ريحني انها صارت مهتمه للعلاج ومهما تعبت ومهما تألمت تواصل ماتوقف
مره من المرات سالتها اذاا قرت البقره ... قالت لا وكانت تعبانه قلت لهاالحبن قومي اقريها ماكملت ٢٠ دقيقه الاتقولي خلصت

تفاجئت قلتها شنو خلصتي ... قالت خلصت قرايه ... قلت مستحيل انتي قريتيها قالت ليش
قلت لانك ماكملتي حتى نص ساعه شلون سورة طويله من جزئين ونص تخلصينها ب ٢٠ دقيقه !!!!

هني بديت اشك هل هي تاخذ العلاج او لا مب شك فيها هي لااا ابدا ... بس شك من اللي فيها يخليها تحسب انها سوت وفالاصل ماسوت شي

فقلت لها انتي ماقريتي البقره تقول يعني اكذب عليج انا قلت لا انا مصدقتك بس اقنعيني انتي شلون جزئين ونص بعشرين دقيقه !؟

قالت لي من قال انه بس عشرين دقيقه !!! اطلعت مش واعيه ولامنتبههه وصدق احساسي فيها كانت بلاشعور
هني قلت بقلبي عيل ليش ماطابت للحين ولاتحسنت الاشي بسيط الااذا كانت مش بوعيها وتحسب انها قرت الرقيه وشربت الماي وسوت جدولهااليومي والله العاالم هي سوت او لا وماعندي حد من اهلها يشرف عليها يخليني اعرف شتسوي

احترت وتهت وادخل النت ادور وابحث لين طحت على موقع الشفاء الاسلامي ... موقع مختص بالرقيه الشرعيه وعلاج حالات المس والسحر بكل انواعه ... كأني طحت على كنز خاصه انه عندهم علاج للحالات ومنها حاله قريبتي واراسل الموقع واشرح له كل اعراضها واللي صار لها

وبفضل الله جاني الرد ثاني يوم من الموقع نفسه ووبديت احس بأذية الجن لي ...

يتبع ،،

وصل العلاج بفضل الله بعد المراسله مع الشيخ ب٤ ايام تقريبا
استلمته ومنذ امسكته انتفضت يدي واصابني خوف غير طبيعي ،،، تعوذت من الشيطان واستغفرت الين هدأت نفسي ومن ثم رحت لاخت من الاخوات كانت عون لي هي وزوجها لاازكيهم على الله ديناً وخلقاً

فتحنا الظرف وقرينا الاشياء المطلوبه لتجهيزها للرقيه من عسل وزيت الزيتون وزيت الحبه السوده وغذاء ملكي ومسك عنبر وماء زمزم

رحت اخذت المطلوب كله ورجعت لهم ،،،، قام زوجها بالقراءه على الماء ثم قمنا بعمل خلطة الزيت للجسم وقام زوجها بالقراءه عليه ايضا
كنت انا وهي نجهز الخلطات ويقوم زوجها بالرقيه عليه كما هو مذكور فاوراق العلاج المرسله
ومن ثم انتهى منه قامت الاخت مشكوره بالقراءه عليه مره ثانيه
ارتحت ان الله سخر لي جميع الاسباب وسهلها من عنده ،،، وماكان الشي يصير لولا رحمة الله على قريبتي

انتهيت من تجهيز المطلوب والقراءه عليه في يومين بفضل الله

لكن صار شي جديد مع قريبتي .... بدت تخاف وتغير رايها من العلاج ... تقول احس اني بموت خلينا نأجل يافلانه !!!


قلت لها ليش التاجيل واحنا ماصدقنا يوصل ... قالت ماتزعلين مني لو غيرت رايي ...

قلت ليش تغيري رايك قالت اخاف اموت .... طبعا جاني احباط تام ومع هذا بلعت حزني وتصبرت ولاقدرت الومها لانها مجبوره بتصرفاتها

قلت لها حبيبتي يالغاليه الموت والحياه بيد الله اذا الله كاتب لنا عمر بنعيشه واذا لا فهو يومنا ... انتي جربتي علاج نفسك فالبيت ليش ماقلتي اخاف اموت

ردت قالت لان هذا من مطوع !! فانا حاسه اني بموت ... قلت انتي اقوى من كذى لاتخليهم يخوفونك ويسيطرو عليك بفكرة انك بتموتي ... هم خايفين من العلاج وخوفك بالموت اذا خذتيه

استسلمت للامر وهي بقمة الخوف والفزع ... وبنفس الوقت ازدادت حيرتي معاها خفت اعطيهاالعلاج وماتاخذه وبدى الوسواس معاي انا وبديت اتردد اعطيها العلاج !!!

بدت نظرتي تتغير للعكس ليش مادري ،،، جهز العلاج وتم عندي كم يوم وانا رافضه اسلمها وهي تترجاني اعطيهاخاصه اني قلت لها ان العلاج اسهل من جدولنااليومي اللي تسويه

.... هي طبعا كانت مصره محد يتدخل من اهلها وانا اصريت انها ادخلهم هالمره

مع اني كنت متفقه معاها اني بعطييها واذا مانفعها تروح لشيخ يقرا عليها مع ابوها او اخوها ،،، بس خفت جاني شعور انها بتقطه او تكذب علي وماتاخذه وساوس غريبه مع اني كنت مصدقتها وهي كانت صادقه معاي بكل لحظاتها سواء كانت بخير او تعبانه

عرفت ان اللي فيني من اذية القرين وان الوساوس هذي منهم ،،، وكنت لما اطلع بالسياره والعلاج معاي اكون بيني وبين السياره اللي قدامي شعره والله اكثر من مره كنت بدعم لولا لطف الله فيني او تنعدم عندي الرؤيه تمام وتصب عيوني دموع تخليني مااشوف مع حكه وحرقه تجيني اذا خرجت فقط
فكنت اشغل قران علطول واذا نزلته البيت العلاج ادخله غرفتي فاشوف عندي بالغرفه اشكال سوداء تتحرك امامي

كنت لله الحمد محصنه وكنت اشغل سورة البقره بارجاء البيت واذا حسيت ان في شي فالبيت امسك مصحفي واقرأ البقره بصوت مسموع اخلص تهدأ نفسي واحس بسكينه وراحه وطمأنينه وانام مرتاحه

عيالي كنت ارقيهم يوميا ا,,,, خذت ماء زمزم وقريت فيه الرقيه الشرعيه وسورة البقره والاذكار واشياء كثيره مااذكرها وكنت صباحا ومساء ارش عليهم الماي بالبخاخ وارش غرفهم زوايا البيت او فراشهم

الحمدلله ماصار لهم شي بفضل الله وكنت انا بس اللي احس واشعر بوجود حد عندي فالبيت ...

يوم من الايام حلمت وقمت افكر بالحلم عارفه انه خير بس جاني احساس انه شر وان لازم مااعطيها العلاج
استغربت من نفسي كلمت مفسر وصدق ظني قال الحلم خير واللي شفتيه شر بس كيده ضعيف وفيه بشاره انه خير لي

هني تاكدت ان اللي فيني من تاثير الجن علشان ماوصل لقريبتي العلاج ... طبعابعدها استخرت واستخرت وبنفس الوقت قريبتي تترجاني اعطيها وتصيح انها تبي تتشافى وبتسوي كل شي مكتوب فيه

لين رضيت وكلمتها اني بمر اعطيها العلاج فكانت ولله الحمد في فرحه سبحان الله وانا في خوف غريب كأن الليً فيها جاني وهي راح عنها ،،،، تغيرت نظرتها وتقبلت العلاج وتنتظره بشوق وانا عكسها تماما

خذت العلاج وتحركت متجهه لبيتهم والخوف فيني يزداد وانا استغفر واذكر الله ... وصلت وخرجت لي كنت قدامها جدا عاديه قربت وسلمت عليها ومسكت يدها انتفضت مني وخافت حسيت بخوفها وماقلت شي

سلمتها العلاج بيدها وانا ادعي الله يكون سبب شفائها وبعدها حركت علشان لحد يشوفني من اهلها صرنا مثل الحراميه بالخش

والله اني من سلمتها العلاج ورجعت طبيعيه جدا وراح مني كل الاحساس والوساوسً.. قلت ان شاءالله خير لها
رجعت البيت واسالها قرتي الاوراق وشنو جدولك اليومي بيكون تقول لي اي قريت ... انا صورت لي نسخه احتفظته عندي علشان اتابعها والاصليه مع العلاج عندها

في خلال ساعه حفظت علاجها وكانت النيه تبتدي فيه ثاني يوم مباشره وكانت متحمسه جدا وكنت مستغربه من حماسها ...

ثاني يوم مع صلاة الفجر بدينا الصلاه ثم الاذكار ثم سماع سور الصافات والجن ويس والحديد ثم اكل ملعقة عسل عالريق ومن ثم دهن الجسم بالزيت صباحا ومساءً لمده اسبوعين
بالاضافه الى اوراق الرقيه كانت تذوبها بماي زمزم المقري وتشرب كاس صبح وكان اول ثلاث ايام اية الكرسي فقط

كنت انتظرها متوتره الين تخلص كامل ومن اول يوم تالمت الم شديد تقول انا احترق جسمي نار وخاصه عند دهن الجسم بالزيت وعند اكل العسل تحس بجنين في بطنها يتحرك رفس بكل اتجاه كانه على وشك ان تتقطع
غير انها تحس بطعم شعر عند البلعوم يزداد الطعم مع كثرة الذكر والاستغفار وتبي ترجع لكن مايطلع شي ،،، ثم اكرمكم الله اسهال اسوود ترتاح بعدها

ثاني يوم وعند سماعها للسور الاربع سمعت صراخ عالي وقوي لاكثر من صوت وخاصه سورة الصافات تعوذت من الشيطان واكملت الين المساء اسهال اكرمكم الله مع شعر ولله الحمد اكثر من مره

هذا كان في اول ٣ ايام من العلاج ،،، كانت تعبانه جدا متألمه محترقه قليلة كلام من شدة مافيها
بعدها راسلت الشيخ اخبرته بكل ماصار

وهذا كان رده لي

السلام عليكم

ممتاز بفضل الله الى الان
كل هذا بشارات طيبة ان العلاج تفاعل جيدا معها وكل ما تشعر من الم وحرقه وصراح انا هو من تعذيب العارض وعدم احتماله للعلاج وبإذن الله سيصل الى مرحله اما انه يحترق او انه يخرج ولا يستطيع البقاء

تستمر على العلاج وعلى الزيت وعلى الاستماع الى السور الاربعه وتزيد عليهم الاستماع كل 3 ايام الى سورة البقرة

ان احست انها تريد ان تستفرغ فهو ممتاز لا تمنع نفسها
والاسهال كذالك ممتاز ينظف الجوف من كل آثار المس

الله يمن عليها بالشفاء التام واخبريها ان الوجع والالم كله يزول تلقائيا فلا تقلق
تمت على مابها من الالام جسديه ونفسيه الى اليوم السابع وكان باليوم هذا الاغتسال بالماي المقري مع ايات الابطال للسحر اعتقد والله ناسيه بالضبط

نفس الجدول اليومي سوته الين فضى البيت وقامت تجهز عدة الغسل فالغرفه كانت مرتاحه ولله الحمد
اثناء تجهيزها احست بتنميل في رجلها اليسرى ومن ثم نفضه وحرقه باصبع رجلهاالصغير كان نار خرجت
تفائلنا خير وقلت لها كملي امورك واول ماتخلصي طمنيني

انتظرت وانا متوتره ماخذت ربع ساعه الاهي تكلمني ابشرك ... قلت خير ايش صار تقول اغتسلت الحمدلله
ومن نزل الماي على راسي وانا احس بحريق تنطفي مني وتنزل مع نزول الماي الين وصل اصابع الرجل تقول احس بدخان يطلع مني مع ارتياح شديد لدرجة انها قالت لي والله احس انه عيد




وهذا نص رسالتي للشيخ

السلام عليكم
بفضل الله ومنته امس اغتسلت الاخت ولله الحمد والمنه حمدااكثيرا مباركا
كان امس حدث جميل لها منذ بدات بتجهيزالماء للغسل وشعرت بحرقان بارجلها ...الرجل اليسرى ارتعشت واحست بدخان يخرج منها واصبحت خفيفه تفاءلنا خيرا

من بدات بالغسل من اعلى الراس تخبرني انها تشعر بدخان يخرج من جسدها من مصب الماء الى الاسفل وارتياح شديد ولله الحمد لدرجه تخبرني انها تشعر كانه عيد
منذ يومين وقف لديها الاسهال وجميع الاعراض سوى حرقه بالاصابع او الاقدام فقط تزول تلقائيا مع الاستماع للسور الاربع او سورة البقره او استماع الرقيه تختفي منها كل ماذكر
يومين اخي الكريم تعيش حياتها طبيعيه تتكلم ولله الحمد وزال عنها الخوف والانطوائيه ومتستمره للعلاج وتسالني متى سوف يقراعليهاالشيخ مع انها كانت شديدة الخوف من ذلك ومتردده
اليوم الصبح بعد صلاه الفجر وقراءة الاذكار والاستماع للسور شعرت بحرقه خفيفه بيدها اليمن زالت بعد مااكملت البرنامج اليومي للعلاج
كذلك بعد العصر احست بحرقه بالذراع اليمنى اكملت اذكارها وبرنامجها المسائي من استماع للسور والرقيه وزالت كل الاعراض لله الحمد من قبل ومن بعد
تخبرني انها اصبحت مبتسمه الان حيث كانت قبل مغلق فمها لاتستطيع الابتسام اما الان تشعر بحياه اخرى اللهم لك الحمد
جزاكم الله خير جزاء فالدنيا والاخره وافرح الله قلوبكم كما افرحتموهاوفرج عنكم كل مايضركم ويسوءكم اللهم امين
اليوم اكملت اليوم الثامن وفي تحسن شديد ولازالت مستمره للعلاج الى اخر يوم
ولي امر جديد ساخبرك به ان شاءالله

صارت لها بعض الاحداث الغريبه اثناء فترة العلاج وكنا نتواصل مع الشيخ باستمرار ونخبره وكان جزاه الله خير يرد علي كل استفساراتنا ويطمنا

انا تعبت من الكتابه فبنسخ الرسائل ورد الشيخ عليه وتفسيره للي يصير

رسالتي له

السلام عليكم ورحمةالله وبركاته
اخي الفاضل غدا تكتمل فترة علاجها ان شاءالله ١٢ يوما
لكن باليوم العاشر حدث امر احببت استشيرك فيه
الاخت ابلغتها بموقعكم على النت فقامت باليوم العاشر تبحث عنه بالنت عن طريق الجوال الى ان دخلت الموقع وقامت بقرائه
طريقة المراسله فاحست بنار تحرق يدهااليمين
اكملت وواصلت تبحث بالموقع الى ان وجدت رقم هاتفك اخي الفاضل بالموقع باسم ابو ايه فاخذت الرقم وخزنته لديها على اساس انها سوف تتصل بعد اتمام العلاج للرقيه
فازداد لديهاالم يدها واحست بصداع وضيق بالصدر ،، الاعراض السابقه وكانت لاتستطيع امساك الهاتف فكان يسقط من يدها
وكل ماامسكته لاتتحكم به فاخبرتني بذذلك وكان الوقت ٥ مساء فقلت لهاتاخذ علاجها الان المسائيٍ
من استماع للسور واكل العسل وشرب الماء ومسح الجسد بالزيت فنفذت كلامي وزالت الاعراض منها بفضل الله
ماهو راييك بالامر هذا وهل يعد طبيعي ام ان لازال بها للان امر المس
كما اتمنى منك اخي الكريم ان تحدد لنا وقت كي تتصل عليك وتقرا عليها الرقيه الشرعيه وحتى نطمئن انها تشافت باذن الله وجزاكم الله خيرا

رده علي

السلام عليكم ورحمة الله

شيئ يحدث غالبا مع كثير من المرضى السبب ان القرين يتأثر بشكل مباشر من العلاج لانه يكون اعتاد وقت من الزمن على نمط معين ويعرف مصدر العلاج وهذا التغيير من اين اتى

فمجرد ان نوت التواصل معنا قرينها احدث لها هذا الخوف لانه كان هذا مصدر ازعاجه وخوفه فنعكس عليها طبيعة القرين

ولكن هذا يزول مع الوقت فلا تتوقف عنده ان شاء الله ولا تلتفت الى الوراء لان نفسيةالمريض تبقى لفترة متأثرة بالحالة القديمة وبإذن الله كله مع الوقت يزول

ممكن ان احببتم الاحد 8 ونصف كلميني على الجوال وانا جاهز ان شاء الله للرقيه

في حفظ الله


خلصنا فترة العلاج كامل وهي في تحسن ملحوظ وقامت بالاتصال للشيخ هي بنفسها بدون خوف ولافزع كما كانت وبهمه ونشاط
قرى عليها ولله الحمد والمنه تشافت تماما بفضل الله وحده زال عنها كل شي ورجعت انسانه طبيعيه عايشه حياتها

ابوها علق عليها يافلانه ليش شهر ماكلمتينا ... يقصد قبل العلاج كانت ماتكلم اي احد قالت مافيني شي قال لازعلانه ماتكلمينا ،، ضحكت وحمدت الله
اخوها الكبير من تجلس معاه تضحك معاه وتتغشمر الي ان تعلى اصواتهم فالبيت وماعمرها سوت كذى من سنين فيستغرب منها ويسالها شاللي غيرك جالسه تسولفي وتضحكين ماعمرج سويتيها
ترد عليه بابتسامه وغشمره وامها تشوفها مصدومه من تغيرها لكن الفرحه طاغيه لتغير بنتها

والحين تجلس مع خواتها وادرسهم وتساعدهم وتدخل المطبخ مع امها وتساعدها وتطلع تتمشى مع اهلها واول وحده تركب السياره قبل الكل

وليومكم الى الان لازالت التعليقات عليها عن سبب تغيرها للافضل وتتكلم مع الكل براحه وابتسامه

اللهم لك الحمد حمدا طيبا كثيرا ملء السموات وملء الارض ... سعادتي مااقدر اوصفها وفرحتي في شفاها فوق الوصف

انتهى .....